Rubavu: Umubyeyi yataye abana b’impanga z’amezi abiri ku muhanda

Mu rukerera rwo kuri iki Cyumweru tariki 04 Werurwe 2018, abanyerondo batoraguye impinja ebyiri z’impanga b’abahungu bari mu kigero cy’amezi abiri mu muhanda wa Gafuku-Giko uherereye mu kagari ka Gikombe, Umurenge wa Rubavu ho mu karere ka Rubavu. Aho bivugwa ko izi mpinja zatawe n’umubeyi utari uwo muri aka gace.

Umwe mu bari baraye irondo yavuze ko ahagana mu ma sa Cyenda z’urukerera aribwo we na bagenzi be babonye umubyeyi ufite abana babiri b’impanga ababwira ko aabajyanye kwa mu ganga nyuma baje kwigira imbere basanga ba bana wa mubyeyi yabasize ku muhanda arigendera.

Umuyobozi w’akarere ka Rubavu wungirije ushinzwe imibereho myiza y’abaturage, Uwampayizina Marie Grace yabwiye Ukwezi ko kugeza ubu icyakozwe kihutirwaga ari ugushaka uburyo abo bana bahabwa ubufasha aho bashakirwa Malayika murinzi wo kubitaho mu gihe uwabataye agishakishwa.

Visi Meya Marie Grace yagize ati “Ngira ngo ikihitirwa twabanje gukora ni ugushaka malayika murinzi wita kuri abo bana, no gukomeza gukurikirana amakuru ariko mu makuru dufite tutari twagirira gihamya ni uko hari uwo twabashije kumenya ni uko uwo muntu atari asanzwe ari uw’inaha ariko ni ugukeka niyo mpamvu dukomeje gukusanya amakuru ngo hamenyekane muby’ukuri uwaba yataye abo bana”

Visi Meya Uwampayizina Marie Grace kandi yakomeje avuga ko iyo igikorwa kigayitse nk’iki kibaye mu karere kabo bakangurira abaturage kujya bamenya inshingano z’abo babyara

Ati Kuko kiriya ni ikiremwa cy’Imana, ni umuziranenge kandi niwe Rwanda rw’ejo, ikindi kandi n’ubwo tutaramenya uwataye aba bana ngo tumenye niba ari urubyiruko cyangwa ari mu kihe cyiciro ariko umubyeyi wese tumukangurira kwirinda inda zitateganyijwe no kumenya kwita ku mwana yabyaye”.

Umusanzu.com

Leave a Reply

Your email address will not be published. Required fields are marked *